Iedzīvotājiem

Kab veicynuotu literarū procesu Latgolā i latgaliski raksteitūs tekstu radeišonu Latvejā, jau trešū reizi bīdreiba “LgSC” izsludynoj konkursu “Latgolys prozys skaitejumi 2022”. Konkursā aicynuoti pīsadaleit vysa vacuma autori, kurī roksta prozu. Konkursa gola pasuokums, kas 8. decembrī nūtiks Rēzeknē, byus daļa nu storptautyskuo festivala “Prozas lasījumi 2022”, kai ari konkursa uzvarātuojam byus vareiba pīsadaleit festivala nūslāguma pasuokumā Reigā.

Literarūs prozys tekstu konkursa “Latgolys prozys skaitejumi 2022” moto ir “Kur ir muna sāta?”. Autori aicynuoti īsyuteit pošu radeitūs i da tuo napublicātus tekstus latgalīšu rokstu volūdā voi latvīšu literarajā volūdā. Dorbi tiks vārtāti, vysu vaira izceļūt na teksta volūdu, bet literaruo teksta kvalitati i pīdareibu Latgolys kulturtelpai, tai atkluojūt regiona sovpateibu i paruodūt latgaliskumu juo plašuokajuos nūzeimēs. Konkursā īsnāgtūs dorbus vērtēs žureja vysmoz treis Latvejis literaturys procesūs īsaisteitu cylvāku sastuovā. Konkursā treis vysuvaira punktu sajāmušī autori sajims atleidzeibys par dorbu publiciešonu 350, 250 i 150 eiro apmārā.

Bīdreibys “LgSC” vadeituoja Edeite Husare par ituo gods konkursa moto soka: “Sova sāta i sātys sajiuta itymā laikā ir cīši vuoreiga byušona – kaids palīk bez sātys karadarbeibys deļ, kaids puorsaceļ iz cytu vītu i rauga sātys sajiutu radeit nu jauna. Taipat rudiņs ir ari laiks, kod studenti nūbrauc studēt iz leluokom piļsātom, pamatūt dzymtuos sātys, bet cyts otkon kai ba fiziski ir sātā, bet voi tī kluotyn ir ari sovys vītys sajiuta…? Aicynojam ituo gods konkursa dalinīkus atkluot konkursa moto “Kur ir muna sāta?” vysdažaiduokūs leimiņus!”

Pīsadaleit konkursā “Latgolys prozys skaitejumi 2022” var, īsnādzūt dorbus – esejis, stuostus, romanu fragmentus (7000–12 000 zeimu apmārā) – da ituo gods 4. novembra, syutūt tūs bīdreibai “LgSC” iz e-postu lgsc@lgsc.lv ar nūruodi “Latgolys prozys skaitejumi 2022″.  Pīsacejumā juobyut teksta elektroniskajai versejai, ziņom par sevi (vuords, pavuorde, dzimšonys gods, nūsadorbuošona, eisa rodūšuo biografeja (3–4 teikumi)) i kontaktinformaceja (telepona numers, e-posts). Ar pylnu konkursa nūlykumu var īpasazeit.

“Latgolys prozys skaitejumi 2022” nūslāguma pasuokums byus ituo gods 8. decembrī 20.30 vokorā kai kluotīnē Rēzeknē, tai video formatā storptautyskuo literaturys festivala “Prozas lasījumi 2022” sātyslopā i latgalīšu kulturys ziņu portalā lakuga.lv. Vaira informacejis par pasuokumu byus novembra golā. Lobuokūs tekstu autori pīsadaleis nūtikšonā ar sovu dorbu skaitejumim, kai ari konkursa uzvarātuojs tiks aicynuots pīsadaleit festivala “Prozas lasījumi” nūslāguma dīnys pasuokumūs 11. decembrī.

Konkurss “Latgolys prozys skaitejumi” pyrmū reizi nūtyka 2020. godā. Pyrmajuos divejuos konkursa nūtikšonys reizēs par uzvarātuoju tyka atzeita tekstilmuokslineica i literate Annele Slišāne ar eisstuostu cyklu nu kruojumim “tuoraga stuosti” i “tuoraga stuosti. pīns”. Lobuokūs autoru vydā pyrmajūs godūs beja ari Ilze Sperga, Evika Muizniece i Evija Martukāne-Laganovska.

Bīdreiba “LgSC” (īprīšk “Latgolys Studentu centrs”) ir navaļstiska organizaceja, kas apvīnoj cylvākus, kam ir svareigi saglobuot i atteisteit Latgolys i latgaliskū kulturtelpu, latgalīšu volūdu. Bīdreiba vysod ir raudzejuse vysu pyrma atbaļsteit jaunūs latgalīšu autorus i izdūt kvalitativu literaturu, viereibu vaira dagrīžūt jaunīšu auditorejai.

Festivals “Prozas lasījumi” nūteik nu 1995. goda, tū organizej Latvejis Rakstnīku savīneiba. Laika gaitā “Prozas lasījumi” nu nalela pasuocīņa Andreja Upīša dzimšonys dīnys pīmiņai izauguši vairuoku dīnu prozys festivalā, kura programā ar sovu jaunuokūs dorbu voi jūs fragmentu skaitejumim pīsadola vysaidu paaudžu Latvejis i cytu vaļstu rakstnīki. Trešū reizi sadarbeibā ar festivalu byus ari kaida nūtikšona ar Latgolys kulturtelpys autorim.

Konkursa “Latgolys prozys skaitejumi” nūtikšonu atbolsta storptautyskais literaturys festivals “Prozas lasījumi 2022”, Vaļsts kulturkapitala fonds, AS “Latvijas dzelzceļš”, latgalīšu kulturys ziņu portals lakuga.lv i žurnals “Domuzīme”.

Video īsavieršona pārnejuo goda konkursa nūslāgumā.

“Latgolys prozys skaitejumi 2022” uzvarātuojis Annelis Slišānis dorba skaitejums.

Vaira dazynuošonai:

Edīte Husare
Bīdreiba “LgSC”
+371 29509672
lgsc@lgsc.lv
www.lgsc.lv